6 школьны дзень. Прафарыентацыйная экскурсія на пажарны аварыйна-выратавальны пост аг. Забалаць "Ёсць такая прафесія – выратавальнік"
08.02.2020 у шосты школьны дзень класныя кіраўнікі 9-х класаў Я.Я.Міхайлава і Г.Ч.Цыбулька арганізавалі прафарыентацыйную экскурсію навучэнцаў 9-11 класаў на пажарны аварыйна-выратавальны пост №11 аг. Забалаць "Ёсць такая прафесія – выратавальнік".
Падчас экскурсіі навучэнцы даведаліся аб умовах працы, аб прафесійных патрабаваннях і вельмі шмат іншага аб прафесіі "выратавальнік".
Днём і ноччу, у спякоту і дождж, у святы і будні яны абавязкова на пасту і заўсёды гатовы прыйсці на дапамогу. Яны — выратавальнікі, усе тыя, хто працуе ў падраздзяленнях і структурах Міністэрства па надзвычайных сітуацыях.
Служба ў іх сапраўды ўніверсальная: яны спяшаюцца на дапамогу на пажары і дарожна-транспартныя здарэнні, да тых, хто церпіць бедства на вадзе, выязджаюць на нейтралізацыю небяспечных рэчываў, ліквідацыю наступстваў стыхіі і г.д. І ў экстрэмальных умовах пацвярджаюць сваё майстэрства, высокі клас, фізічную падрыхтаванасць, часцяком рызыкуючы здароўем, а то і жыццём.
Патэлефанаваўшы па нумары 101, можна ўпэўнена разлічваць на хуткую і высокакваліфікаваную дапамогу ў любой надзвычайнай сітуацыі.
Выратавальнікі пастаянна ўдасканальваюць прафесійнае майстэрства, у тым ліку асвойваючы і сумежныя спецыяльнасці.
Але самае галоўнае ў напружанай і адказнай рабоце падраздзялення МНС №11 – надзейны заслон пажарам, паводкам, аварыям. Вядзецца актыўная прафілактычная і агітацыйна-асветніцкая работа. Яна арганізавана ў цесным узаемадзеянні са спецыялістамі раённага аддзела ўнутраных спраў, тэрытарыяльнага цэнтра сацыяльнага абслугоўвання насельніцтва, сельвыканкамамі, аддзелам адукацыі райвыканкама.
У нашай прафесіі-дзеліцца Віталій Шылко- як і ў многіх іншых, кадры – аснова асноў. Ад правільных і рашучых дзеянняў кожнага залежыць агульны вынік. Цярпліва, настойліва і строга адпрацоўваліся неабходныя навыкі. Дзесьці ў умоўных надзвычайных сітуацыях, а дзесьці - у рэальных, - успамінае свае першыя крокі ў прафесію суразмоўца.
Цяпер Віталій Шылко на правах дасведчанага выратавальніка стаў прыкладам для пачаткоўцаў. Па словах суразмоўцы, ужо пасля першых выездаў разумееш, наколькі важна на месцы здарэння працаваць не толькі аператыўна, але і зладжана. Таму рабочыя суткі пажарныя праводзяць у трэніроўках, удасканальваюць веды тэорыі пажаратушэння, абслугоўваюць тэхніку, здаюць залікі і нарматывы па баявой і фізічнай падрыхтоўцы. Выразны распарадак дня распісаны літаральна па хвілінах, парушыць яго можа толькі паведамленне дыспетчара аб надзвычайным здарэнні. Атрымаўшы яго, дзяжурная змена імгненна адпраўляецца на выезд.
